ជំនួបអ្នកនិពន្ធ ៖ ជីវិតដែលពួកយើងចង់បាន (កញ្ញា សឿម ហឿង និង កញ្ញា ចៅ សោភ័ណ)

ជំនួបអ្នកនិពន្ធ ៖ ជីវិតដែលពួកយើងចង់បាន
ជាមួយកញ្ញា សឿម ហឿង និង កញ្ញា ចៅ សោភ័ណ

តើ​ការ​ធ្វើ​ជាម្ចាស់​ជីវិត​ដែល​អ្នក​ចង់​បាន ​មានរសជាតិយ៉ាង​ណា? តើអស្ចារ្យប៉ុណ្ណានៅពេលដែលអាចធ្វើឱ្យក្តីស្រមៃរបស់អ្នកមានជីវិត?
អ្នកនិពន្ធនឹងមកចែករំលែកពីបទពិសោធពីការធ្វើដំណើរជុំវិញប្រទេសកម្ពុជា របៀបចងក្រងសៀវភៅ​​ និងលើកទឹកចិត្តឲ្យអ្នកចូលរួមមានភាពក្លាហាន​និងច្នៃប្រឌិតដើម្បីសម្រេចក្តីសុបិន និងគោលបំណងក្នុងជីវិតរបស់ពួកគេ។

--

នៅឆ្នាំ២០២០ កញ្ញា ចៅ សោភ័ណ និង កញ្ញា សឿម ហឿង បានចាប់ផ្តើមដំណើរផ្សងព្រេងរយៈពេល ៣៦៧ថ្ងៃសរុបជាង ១២,០០០ គីឡូម៉ែត្រ ជុំវិញ ២៥ រាជធានីខេត្តរបស់ប្រទេសកម្ពុជា។ ពួកគេបានបំបែកកំណត់ត្រាជីវិតរបស់ខ្លួនចេញពីប្រព័ន្ធជីវិតដដែលៗ ហើយផ្តល់សេរីភាពពេញលេញ ដើម្បីបង្កើតផ្លូវថ្មីមួយសម្រាប់ខ្លួនឯងទៅក្រេបយករសជាតិជីវិតដ៏សម្បូរបែបនៅតាមភូមិស្រុកនានា។

លើសពីការធ្វើដំណើរ វាជាការប្រមូលផ្តុំដ៏រស់រវើកនៃរឿងរ៉ាវ បទពិសោធន៍ និងរសជាតិដែលឆ្លុះបញ្ចាំងពីជីវិតនៅកម្ពុជា។​​ សេរីភាពនារីពីរនាក់ក្នុងការ ជ្រើសរើសរបៀបក្នុងការរស់នៅ​ និងរៀបចំជីវិតដែលពួកគេចង់បាន​ ហើយបង្កើតពិភពខ្លួនឯងមួយសម្រាប់ការរៀន​​ ឆ្លុះបញ្ចាំង និងលូតលាស់ជាមួយគ្នា។ ការធ្វើដំណើរជាង ១២,០០០គីឡូម៉ែត្រ ក្នុងរយៈពេល៣៦៧ថ្ងៃនេះ ក៏បានក្លាយជាការចាប់ផ្តើមនៃរឿងរ៉ាវមួយ តំណាងឲ្យភាពក្លាហានរបស់នារីពីរនាក់ក្នុងការជំនះគ្រប់ ឧបសគ្គដើម្បីសម្រេចក្តីស្រមៃ ការស្វែងយល់ពីខ្លួនឯង និង ក្តីស្រឡាញ់ចំពោះប្រទេសកំណើត។

នៅឆ្នាំ២០២៤ សាច់រឿងរបស់អ្នកទាំងពីរបានបង្ហាញខ្លះៗតាមរយៈការតាំងពិព័រណ៍រូបថតលើកទី១៥ របស់មហោស្រពរូបថតភ្នំពេញ (15th Phnom Penh Photo Festival ) ដែលទទួលបានការគាំទ្រយ៉ាងច្រើនពីមិត្តភក្តិ និងសាធារណជន។

ក្រោយពីជំនះឧបសគ្គជាច្រើនក្នុងដំណើរការសរសេរ និង ចងក្រងសៀវភៅ "ម្ចាស់ជីវិត ម្ចាស់ពេលវេលា" អស់ជាង៥ឆ្នាំ ជាស្នាដៃរួមគ្នា ហើយសៀវភៅនេះគឺជាភស្តុតាងនៃភាពក្លាហាន ការអត់ធ្មត់ និងការប្តេជ្ញាចិត្តក្នុងការបំផុសគំនិតអ្នកដទៃ មិនឱ្យបោះបង់ក្តីស្រមៃ និងគោលបំណងក្នុងជីវិតដែលពួកគេចង់បាន។